Македонската каратистка Ада Муртезани освои сребрен медал во категоријата кумите 13 години женски до 49 кг, на првиот ден од Балканското првенство за деца, по серија одлични настапи и борби против квалитетни противнички од повеќе држави.
Во првото коло, Муртезани убедливо ја совлада Јосипа Цук со резултат 7:1, со што го отвори натпреварувањето на сигурен и доминантен начин. Во втората борба, таа продолжи со добра форма и во тесен и неизвесен меч ја победи Турчинката Озде Дегимеренци со 4:3.
Во третата борба следуваше тактички многу напнат дуел против хрватката Марта Кордиќ, кој заврши без поени 0:0, по што Ада победи со судиско изјаснување. Во четвртата борба за влез во финале, таа беше подобра од романката Истрате Софија со 3:1, со што обезбеди пласман во финалната борба.
Во финалето, Муртезани одигра израмнет меч против домаќинката од Турција, Бетул Нур Ајкин, но во тесна завршница беше поразена со 1:2, со што го освои сребрениот медал.
Со овој резултат, Ада Муртезани уште еднаш го потврди својот квалитет и потенцијал на меѓународната сцена и се вбројува меѓу перспективните млади македонски каратистки во својата категорија.
